“பி-பப்பா புடிங் & மொறு மொறு வறுத்த கடலை”

ஹா ஹா ஹா தலைப்பே புதுசா இருக்கெல்லோ. நேற்று வெங்கட் நாகராஜ் பக்கத்திலே ஒரு ரெசிப்பி போட்டிருந்தார். அதைப் பார்த்தவுடன் எனக்கு உடனேயே செய்யோணும் எனும் ஆசை வந்துது, ஆனா அங்கு ஆதி, அளவு குறிப்பிடவில்லை, கேட்டிருந்தேன் இன்னும் பதில் இல்லை., எனக்குப் பொறுமை இல்லை:), சரி பறவாயில்லை , நான் என்ன அஞ்சுவோ அளவெடுத்துச் செய்வதற்கு:) ஹா ஹா ஹா.. நாமதான் சமையல் குயின் ஆச்சே:), எனக்கெதுக்கு அளவு என எண்ணிக்கொண்டு ஆரம்பிச்சேன்.

நான் எடுத்த அளவுகளைச் சொல்கிறேன், ஆனா என் அளவில் சில மாற்றங்கள் கொண்டு வரவேண்டும்.

Full cream milk - 500 ml

இதனை நன்கு காச்ச வேண்டும்..  காச்சியபின் இறக்கி கொஞ்சம் ஆவி அடங்கியதும், கொண்டென்ஸ்ட் மில்க் ஐ சேர்த்துக் கலக்க வேண்டும். நான் இதற்கு எடுத்த அளவு 6 மேசைக் கரண்டிகள்.[இது என் கணக்கின்படி போதாது, இன்னும் கொஞ்சம் 10-15 கரண்டிகள் போட்டால் நல்லது].

பின் அதனுள் நல்ல கட்டித்தயிர் 4 மேசைக்கரண்டிகள் சேர்த்தேன்.. இதையும் 3 கரண்டிகள் சேர்த்தால் போதும் என நினைக்கிறேன்.  அனைத்தையும் நன்கு கலந்து, ஆவியில் அவித்து எடுத்தேன். என்னிடம் மண் குட்டிப்பானை இல்லை, அதனால கிளாஸ் டிஸ் இலேயே அவித்தேன்..

அரை மணித்தியாலத்தில் இப்படி அவிந்து வந்திருந்தது.

பின்னர் ஃபிரிஜ்ஜில் ஒரு மணி நேரம் வைத்து எடுத்ததும் இப்படி ஆச்சு...

இப்போ சாப்பிடலாம் வாங்கோ..

அதிராவில் ரா மறைக்கப்பட்டிருக்கு:)

முடிவில டிஸுக்கி:- அது என்னான்னா, பார்க்க அழகாகத்தான் இருக்கு, ஆனா நான் படம் பார்த்து ஆசைப்பட்டளவுக்கு சுவை வரவில்லை, யோகேர்ட் சுவையாகவே இருந்தது.. அதனால்தான் என் அளவை மாத்தச் சொன்னேன்_()_

=================இடைவேளை=================

இடைவேளை விட்டிருக்கு, போய் ஒரு பிளேன் ரீ யும் பருப்பு வடையும் சாப்பிட்டுத் தென்பாகி வாங்கோ, அடுத்த ரெசிப்பி செய்யலாம்:)..

======================================================

அடுத்து என் ஃபேவரிட் வறுத்த கடலை. ஊரில் கோயில்களில் மண் போட்டு சுடச்சுடக்  “கச்சான் ஆச்சி” வறுத்துத் தருவா, அது எப்படிச் செய்வதெனத் தெரியாமல் தேடித்திரிந்தேன். சில குறிப்புக்கள் கிடைத்தன, ஆனா அதிலும் தெளிவு இல்லை, அதனால விடா முயற்சி பண்ணி மூன்றாம் முறையாகவே சரியான செய்முறை கண்டு பிடிச்சேன்.

இந்த வறுவைக்கு தேவையானது, கடலை தவிர.. உப்பு மற்றும் இங்கு நான் பாவித்திருக்கும் கரண்டி.

1. முதலில் உப்பை நன்கு சூடாக்க வேண்டும், பின்னர் இந்தக் கொண்டைக்கடலையை கொஞ்சமாகப் போட்டு நன்கு பிரட்டிப் பிரட்டி எடுக்கோணும்.. 

இந்த முறை சரி வரவில்லை, ஹார்ட் ஆக இருந்துது. அதனால கொஞ்சம் கடலையை ஊறப்ப்போட்டுவிட்டேன்.

2. கடலை 5,6 மணித்தியாலங்கள் ஊறிட்டுது, அதனை வடித்து அப்படியே ஈரத்தோடு உப்பில் போட்டேன்... கர்ர்ர்ர்ர்ர்ர்ர்ர்ர்ர்ர் அதுவும் உப்புக்கடலைபோலவே ஆகிட்டுது:)... இதுவும் சரிவரவில்லை:).

3. விடா முயற்சியாக மூன்றாம் தடவையே கண்டு பிடிச்சேன். அதாவது கடலையை 20-30 நிமிடங்கள் மட்டுமே ஊறவிட்டு, டக்கென வடிச்சு எடுத்து பேப்பரில் அல்லது ஒரு துணியில் போட்டு நன்கு உலர விட வேண்டும்.. வெய்யிலில் அல்ல. ஈரத்தன்மை இல்லாமல் போகும்வரை விட்டு விட்டு பின்பு இப்படி, உப்பை நன்கு சூடாக்கி, கடலையைக் கொஞ்சம் கொஞ்சமாகப் போட்டு பிரட்டிப் பிரட்டி எடுக்கோணும், சூப்பராக வந்துது. கறுக்கும் வரை விட்டிடக்கூடாது.

இதே முறையிலேயே அனைத்து தானியங்களிலும் செய்யலாம் என்பதால் செய்தேன், ஆனா கடலை மட்டுமே நல்ல சுவை, ஏனையவை சுமார்தான்.

இதிலிருப்பவை, கெளபி, கிட்னி பீன்ஸ், கச்சான், பயறு, கொ.கடலை.

வழமையாக கச்சான், பயறு இரண்டையும் ஊறவிடாமல் அவனில் போட்டு எடுப்பேன், இது இந்த முறையில் செய்து பார்த்தேன்.  என்னில் ஒரு பழக்கம் இருக்கு, வீட்டில் நின்றால் எதையாவது கொறிக்கோணும்:), அதனால இப்படி வறுத்து வச்சால், உடம்புக்கு கேடில்லை, இல்லை எனில் தேவை இல்லாததெல்லாம் வாயில் நுழையும்:).

ஊசி இணைப்பு

ஹா ஹா ஹா:)

ஊசிக்குறிப்பு:

💞💞💞💞💞💞💞💞💞💞💞💞💞💞💞💞

	Tweet