ஆண்களால் இப்படியும் சபதம் எடுக்க முடியுமோ?:)

ஹா ஹா ஹா தலைப்பைப் பார்த்து யாரும் பயந்திடாதீங்கோ:) இந்தக் காலத்தில உங்களை யாரும் இப்படி சபதம் எடுக்கச் சொல்லிக் கேய்க்கவே மாட்டோம்:).

2ம் பகுதியிலிருந்து கதை தொடர்கிறது.. வழமைபோல என் பாஷையில் மானே தேனே போட்டு எழுதுவதால், தவறுகள் வரலாம் மன்னிச்சிடுங்கோ:).. இதன்
முதல் பாகம் படிக்க இங்கு..
2ம் பாகம் படிக்க இங்கு..

தூரத்திலே அப்பெண்ணிலிருந்து வரும் மல்லிகை வாசனையையும், அவ படகோட்டும் அழகையும் பார்த்து அப்படியே லயித்துப் போயிட்டார் வல்லபன்... அப்பெண்ணைப் பார்க்க வேண்டும், பேச வேண்டும் எனும் எண்ணம் மனதில் அதிகமானது.  கரையிலே காத்திருந்தார்.. அது ஜமுனைக் கரையாம்... படகு வந்து ஆட்களை இறக்கியது, திரும்பும்போது வல்லபன் அதில் ஏறி அமர்ந்து கொண்டார்... வேறு யாரும் ஏற இல்லாமையால், இவரை மட்டுமே ஏற்றிக்கொண்டு, அப்பெண் திரும்பினா(பார்த்தீங்களோ இதுதான் விதி என்பது:)).

ஏறி அமர்ந்தவருக்கு மனம் துடித்தது, அப்பெண் அழகென மட்டுமில்லை ஏனோ அவருக்கு மிகவும் பிடித்து விட்டது, இப்பெண்ணை மணந்தால் என்ன?எனும் எண்ணம் அதிகமானது.. அவர்தான் பன்னாட்டு ராஜா ஆச்சே.. நினைத்தால் யாரையும் திருமணம் செய்து கொள்ளலாம், அப்படியிருக்க இப்பெண்ணையே மனம் நாடியது. உடனே அப்பெண்ணிடம் சும்மா விபரம் கேட்டார்...

அதுக்கு அப்பெண் பதில் சொன்னா... என் பெயர் “பரிமளா”:) நான் ஒரு மீனவப் பெண், இப்படகை இக்கரைக்கும் அக்கரைக்கும் ஓட்டுவதுதான் என் தொழில், என் தந்தை ஊரிலே இருக்கிறார்.. என பெயர் விபரம் சொன்னா.

ஆனா உன்னைப் பார்த்தால் ஒரு மீனவப் பெண்போல இல்லயே, தேவலோகப் பெண்போலல்லவா இருக்கிறாய் என்றார். அதுக்கு அப்பெண் சொன்னா, முன்பு அப்படித்தான் இருந்தேன், என் படகிலே ஒரு மகரிஷி ஏறினார்.. அவர் கொடுத்த வரத்தினாலே இப்படி ஆகிட்டேன், என் பெயரும் மாற்றப்பட்டு விட்டது என.

உரையாடல் முடிஞ்சுது, எதுவுமே பேசாமல் வல்லபன் வீடு திரும்பிட்டார். வீட்டுக்கு வந்தவருக்கு எதுவும் சரியாக ஓடவில்லை, மனம் பறிபோய் விட்டது, அதனால் அடிக்கடி ஜமுனைக்கரைக்குப் போவார், படகில் ஏறிச் சவாரி போவார், திரும்பி வந்திடுவார்.. பரிமளாவோடு ஏதும் பேச மாட்டார்...

ஏனெனில் அவரின் மனதில் குழப்பம். மகனைப் பட்டத்து இளவரசன் என அறிவித்தாகிவிட்டது, மகனுக்கு பெண்தேட வேண்டிய வேளையில், எனக்கு எப்படிப் பெண் தேடுவது ??.. அவருக்கும் 50 வயதுக்கு கிட்ட வந்துவிட்டது.. புத்தி சொல்லியது .. இது தப்பு என, ஆனா மனம் சொல்லியது, அதனாலென்ன எனக்கொரு வாழ்க்கை தேவைதானே? இத்தனை காலமும் என்னத்தைக் கண்டு விட்டோம் என.

இப்படிப் போராட்டத்தின் மத்தியில், அவர் நேர்மையாகவே முடிவெடுத்தார், நேராகப் பரிமளா வீட்டுக்குப் போய், தந்தையிடம் பெண் கேட்கலாம் என.  தன் தேரிலே ஏறி, பரிமளா வீடு சென்றார்.. அது ஒரு குடிசை. குடிசை வாசலில், தேரில் இருந்து நாட்டின் அரசன் இறங்கி, வீட்டுக்குள் வருவதைக் கண்டதும், பரிமளாவின் தந்தைக்கு லெக்ஸ்ச்சும் ஆடல்ல காண்ட்ஸும் ஓடல்ல:).

வந்த வல்லபன் நேரே பெண் கேட்டார். தந்தைக்கோ சந்தோசம், என் மகள் உங்களுக்கு மனைவியாவதற்கு கொடுத்து வைத்தவ.... ஆனால் ஒரு கண்டிஷன் என்றார் தந்தை:)...

கண்டிஷன் எனும் சொல் காதில் விழுந்ததும் உஷாராகிட்டார் வல்லபன்:), ஏனெனில் ஏற்கனவே ஒரு கண்டிசனுக்கு கட்டுப்பட்டுத்தானே இவ்ளோ கஸ்டப்படுகிறார் இன்றுவரை:).  இருப்பினும் என்னதான் போடப்போகிறார் என நினைச்சு சொல்லுங்கள் என்றார்...

பெண்ணின் தந்தை சொன்னார், என் மகளை மணம் முடிச்சு, அதனால் பிறக்கும் குழந்தைக்கே, சொத்தும், அரச உரிமை.. நாடாளும் மன்னன் எனும் பதவி கொடுக்கப்பட வேண்டும். உங்கள் இப்போதைய மகன்  “விஷ்ணு” வுக்கு கொடுக்கக்கூடாது என...

இக் கண்டிஷனைக் கேட்ட வல்லபனுக்கு மனம் இடிந்து விட்டது, இது எப்படி சாத்தியமாகும், விஷ்ணுதான் அடுத்த அரசன் என முடிசூட்டுவிழாவும் நடத்தியாச்சே... அனைத்து திறமைகளையும் கொண்ட விஷ்ணு.. இருக்கும்போது, இன்னும் பிறக்காத குழந்தைக்காக எப்படி வாக்குக் கொடுக்க முடியும் என நினைச்சு, பெண் வேண்டாம் எனச் சொல்லி விட்டுத் திரும்பி விட்டார்.

சொல்லிவிட்டாரே தவிர, அவரால் நிம்மதியாக இருக்க முடியவில்லை.... உண்ண முடியாமல், உறங்க முடியாமல், சரியாக தன் நாட்டைக் கவனிக்க கூட முடியாதளவுக்கு சோர்வடைந்து விட்டார். இதைக் கவனித்த மகனுக்கு தெரிந்துவிட்டது, தந்தைக்குள் ஏதோ ஒரு சோகம் இருக்கிறது என. ஆனா இப்படி ஒரு பிரச்சனை இருக்குமென எண்ணவில்லை.

நேரடியாகத் தந்தையிடம் கேட்டான் , அவர் வழமையான தந்தையர்கள்போல, இக்க்கதையை மகனிடம் எப்படிச் சொல்ல முடியும் என நினைச்சு, வேறு காரணம் சொல்லி மழுப்பி விட்டார். விஷ்ணுவால் சமாதானமடைய முடியவில்லை, ஏதோ இருக்கிறது என நினைச்சு.. நேரே தேரோட்டியிடம் போனார்.

ஏனெனில் கார் ட்றைவருக்குத்தான் தெரியும், கார் உரிமையாளர் எங்கெல்லாம் போகிறார் என:), அதேபோல அக்காலத்தில் தேரோட்டிகளுக்கே தெரியும் ராஜா எங்கெல்லாம் போகிறார் என. தேரோட்டிக்கு விபரம் தெரியாது, ஆனா அந்த மீனவ வீட்டுக்குப் போய் வந்ததிலிருந்தே இப்படி ஆகிவிட்டார் எனச் சொன்னார்.

உடனே விஷ்ணு தேரில் ஏறி, அவ் மீனவ வீட்டுக்கு போகும்படி சொன்னான், அங்கு போனதும் பரிமளாவின் தந்தையிடம் விபரம் கேட்டான். தந்தை நடந்ததைச் சொன்னார்.

உடனே விஷ்ணு சொன்னான், அரசாளும் உரிமை வேணும் எனில், என்னையல்லவா நீங்கள் கேட்டிருக்க வேண்டும், விட்டுக்கொடுக்கப் போவது நான் தானே... என் தந்தையின் சந்தோசம்தான் எனக்கு முக்கியம்... அதனால ..
இதோ சொல்கிறேன் கேளுங்கள்.. எனக்கூறி...

பூலோகம், தேவலோகம் என அனைத்துலகுக்கும் கேட்கும்படி தன் சபதத்தைச் சொன்னார்... 

என் தந்தைக்கும், உங்கள் மகள் பரிமளாவுக்கும்[பரிமளகந்தி], பிறக்கப் போகும் குழந்தைக்கே முழுச் சொத்தும், அரசாளும் உரிமையும் உண்டு, நான் எதிலும் குறுக்கே வரமாட்டேன், ஒருவேளை உங்களுக்கு சந்தேகம் வரலாம், எனக்குத் திருமணமாகி அதனால் வரும் வாரிசுகள் போட்டிக்கு வந்திடுமோ என, அச் சந்தேகம் வேண்டாம், நான் திருமணமே செய்து கொள்ள மாட்டேன்..

இன்னொரு சந்தேகமும் வரலாம், திருமணமாகாமல், என் மனம் தடுமாறி, இன்னொரு பெண்ணோடு உறவுகொண்டு, அதனால் குழந்தை தவறுதலாகப் பிறந்தால், அக்குழந்தை பங்குக்கு வந்திடுமே என.. அதுக்கும் சத்தியம் செய்கிறேன், மனதால்கூட எப்பெண்ணையும் நினைக்க மாட்டேன்..

[இன்னொன்று இருக்கிறது, அக்காலத்தில் அதிக வரமும், பலமும் பெற்றிருக்கும் மகரிஷிகளின் உடம்பிலிருந்து உயிரணுக்கள் வெளியே வந்தால்கூட, அதிலிருந்து குழந்தைகள் தானாக உருவாகுமாம்]... அதனால் விஷ்ணு தொடர்ந்தார்... நான் பெற்றிருக்கும் வரங்களினால், என் உடம்பிலிருந்து உயிரணுக்கள் வெளியே வர விடமாட்டேன், தியானத்தின் மூலம் அவற்றை வெளிவராமல் பண்ணுவேன்.. இவை அனைத்தும் சத்தியம்... இப்போ பெண்ணைக் கொடுங்கள் என்றார்.

இப்படி ஒரு சபதத்தை இதுவரை யாருமே செய்ததில்லை என்பதால், தேவலோகத்திலிருந்து தேவர்கள்.. “வீஷ்ம.. வீஷ்ம.. வீஷ்ம...” எனக் குரல் கொடுத்தார்கள்... விஷ்ம என்றால் பயங்கர.. என அர்த்தமாம்.. அதாவது பயங்கரமான சபதத்தை மேற்கொண்டவர் எனும் காரணத்தால் அவர் “வீஷ்மர்” எனும் பெயர் கிடைக்கப்பெற்றார்.. விஷ்ணு:).

ஸ்ஸ்ஸ்ஸ் அப்பாடா, இச் சபதத்தை உங்களுக்கும் சொல்ல வேணும் என்றே, இக்கதையை எழுதத் தொடங்கினேன். அத்தோடு பெண்ணைக் கொடுத்தார், உடனேயே தேரிலே ஏற்றிச் சென்று தந்தைக்கு மணம் முடித்து வைத்தார்..

இப்போ தான், ஜி எம் பி ஐயாவின் லிங்கில் போய்ப் படிச்சு அறிஞ்சு கொண்டேன்.. இந்த, என் கதை நாயகன் வல்லபனுக்கும்:)[சந்தனு]... பரிமளாவுக்கும்[பரிமளகந்தி] பிறந்த மூத்த மகன் தான் திருதராஷ்டிரன் என்பதை.. ஹையோ ஹையோ:).

மிகுதியை மகாபாரதம் படிச்சு தெரிஞ்சு கொள்ளுங்கோ.. நன்றி வயக்கம்:) __()__

முடிவுற்றது:).

எனக்கொரு சந்தேகம், இவ்ளோ பெரிய, பயங்கரமான பிரமச்சரியத்தை மேற்கொண்டு, தந்தைக்கும் ஒரு நல்ல மகனாக இருந்த வீஷ்மருக்கு ஏன் கோயில் ஏதும் இல்லை?.. யாரும் இவரை நல்லவர் என வணங்குவதில்லை?.. ஏதும் மறைபொருள் காரணம் இருக்குதோ?... ராமன் மட்டும் எப்படிக் கடவுளாக மக்களால் ஏற்றுக்கொள்ளப்பட்டார்?.

ஊசிக்குறிப்பு:
இது.. மேஜராக(இது வேற மேஜர்:)) இருக்கும்சகோ சீராளன், நான் எழுதிய ஒவ்வொரு பகுதியையும் ... கவிதையில் அழகாகச் சுருக்கிச் சொன்னார்.. அதையும் இங்கே இணைக்கிறேன்.. மூன்றாம் பாகத்திற்கான கவிதையை பின்னூட்டத்தில் தருவார் என பிரித்தானிய பூஸ் வானொலி நிலையம் எதிர்பார்க்கிறது:).. மிக்க நன்றி சீராளன்.

பகுதி ஒன்று:-

வாக்கினால் இணைந்த காதல் 
...வலியதைச் சேர்த்த பாங்கை 

நோக்கினால் உள்ளம் வாடும் 

...நுடங்கியே உயிரும் ஆடும்

தேக்கினால் நீரும் மாசாம் 

...தெளிந்திடா வாழ்க்கை தூசாம் 

நாக்கினால் கெட்ட மன்னா 

...நலிந்திடல் வீழ்ச்சி கண்ணா....!

----------------------()()()()()()()()---------------------

பகுதி 2:-

எண்ணிய படிதான் வாழ்க்கை 
..இருந்திடு மென்ப தைப்போல் 

நண்ணிய மனையாள் விட்டு 

..நகர்ந்ததும் மன்னன் நாளும் 

கண்ணிய மெல்லாம் காத்துக் 

..கற்பிலே ஒழுகி நின்றான் 

திண்ணிய மனத்தில் அந்தத் 

..தேவதை நினைவு காத்தான் !

எட்டிரெண் டாண்டு போனால் 

..எழிலவள் வருவாள் என்றே 

கட்டினான் காதல் கோட்டை 

..கனவிலும் வளர்த்தான் நாட்டை 

முட்டிடும் விழிநீர் தன்னை 

..முகாரியாய் மறைத்த போதும் 

கட்டளை இட்டாள் தன்னைக்

..காணவே வாழ்ந்தி ருந்தான் !

வந்திடும் அவளைத் தன்பால் 

..வைத்திட நினைத்தான் மீண்டும் 

தந்திடும் மகனைப் பார்த்துத் 

..தயங்கியே அவளைக் கேட்டான் 

வெந்திடும் வார்த்தை இன்றி 

..விளக்கியே மறைந்து போனாள் 

அந்திடும் இருளைப் போலே 

..அடிமனம் கறுத்தான் மன்னன் !

அருங்கலை யாவும் ஊட்டி 

..அன்புடன் மகனைத் தந்தே 

பெரும்பணி முடிந்ததென்று 

..பிரிந்தவள் எண்ணி வாழ்ந்தால் 

அரண்மனை செழிக்கா தென்றே 

..அடிமனம் சொன்ன போதில் 

விரும்பிய மனையாள் தேடி 

..விரைந்தவன் கதையைக் கேளீர் !

உற்றவள் போன பாதை 

..உயிர்ப்புடன் இருந்தும்! ஆங்கே 

அற்பமாய் வந்து போனான் 

..அதனையும் மறந்தான்! பின்னே

கற்புளாள் காதல் தேடிக் 

..கரையினில் வந்தான் ! ஐயோ 

இற்றவன் மனத்தை மீண்டும் 

..எழுப்பிட வருவாள் யாரோ....?

======================================================================

ஊசி இணைப்பு:

முகிலிடை இருக்கும்வரை - நிலவு

ஒளியற்றுத்தான் இருக்கும்...

தத்துவம் தத்துவம்:).. இதனை பூஸ் ரேடியோவில் கேட்டு, இங்கே உங்களுக்காகக் காவி வந்தவர்:_ உங்கள் பேரன்புக்கும் பெருமதிப்பிற்கும் உரிய புலாலியூர்ப் பூஸானந்தா:).
AAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAAA
இதோ அதிராவுக்கு தமனா மகுடம் சூட்ட வரும் உங்களுக்காக:)
=====================================================================================

	Tweet