K சரியும்.. அம்மாவும் மீயும்:)

நாமிருவர் நமக்கிருவர் போதும் என நிம்மதியாக இருந்த குடும்பத்தில:), 5 வருட இடைவெளியின் பின்னர்.. அதிரடியாக வந்து பிறந்த கொயந்தை நான்:). அதனால வீட்டில் அனைவரும் பயங்கர செல்லம் தருவார்கள் . நான் மட்டும் அப்பாவிடம், ஒரு அடிகூட வாங்கியதில்லை. எப்பவும் அம்மாவோடயே ஒட்டி இருப்பேன்.. ஒரு குட்டி இடத்தில் அம்மா இருந்தால்கூட, ஓடிப்போய் ஒட்டி உரசி கஸ்டப்பட்டு அதில் நானும் இருப்பேன்... இப்போ இந்தப் பழக்கம் எங்கள் டெய்சிப்பிள்ளையிலும், சின்னவரிலும் இருக்குது.

பாருங்கோ எத்தனை மணியானாலும், நான் பெட் போகும் வரை, நான் எங்கு இருக்கிறேனோ அங்கே...என்னோடயே  அருகில் என் முகத்தை உற்றுப் பார்த்தபடி..தூங்கித் தூங்கி இருப்பா, கோபம் வந்தால் எட்டி எட்டி கீ போர்ட்டைத் தட்டி விடுவா:), அவவின் பரிதாபம் தாங்க முடியாமல் bed க்கு போயிடுவேன்:). உடனே தானும் ஓடி வந்து தன் பெட்டில் படுப்பா.

இப்படி அம்மாவோடு ஒட்டி இருந்த நான், பின்னர் வளர வளர நல்ல நண்பிபோல மாறி அம்மாவும் நானும் அரட்டை பண்ணுவதில் குறைவே இல்லை.  திருமணமாகி மூத்த மகன் பிறந்த பின்னர்தான் நாம் தனியே வந்து, நான் சமைக்க தொடங்கினேன். அதுவரை சமைப்பதில்லை, ஆனா அம்மா சமைக்கும்போது பெரும்பாலும் பக்கத்தில் இருந்து பார்ப்பேன், அம்மாவும் சொல்லித்தருவா ஒவ்வொரு சமையல் நுணுக்கங்களை.

அதனால முன்ன முன்னம் சமைக்கிறோம், சமைக்க தெரியாதே எனும் கவலையோ.. சமையலில் தப்போ எப்பவும் இருக்கவில்லை எனக்கு. இது ஒருபுறம் இருக்க, எங்கள் அம்மாதான் எங்கள் குடும்பங்களுக்குள் சமையலில் மிகவும் கெட்டிக்காரி.

சமீபத்தில் எங்கள் புளொக்கில் - நெல்லைத்தமிழனின் அல்வா ரெசிப்பியில், கோதுமை அல்வா, அரிசி அல்வா பற்றி பேச்ச்சு நடந்தது .. இதில் கோதுமை அல்வாவை நாம் “மஸ்கட்” என்போம், அரிசி அல்வாவை - “தொதல்” என்போம்... இப்பெயர்கள் சிங்களத்தில் இருந்து வந்தவை எனத்தான் நான் நினைத்திருந்தேன்.. கேரளா பெயர் என்பதுபோல நெ.த சொன்னதாக நினைவு. அது போகட்டும்.

இந்த தொதல் செய்வதில் எங்கள் அம்மா மிக திறமையா செய்வா. தனித்தேங்காப்பாலில் அரிசிமாவைச் சேர்த்துச் செய்வது. ஊரில் அடிக்கடி செய்வோம். குக்கரில் செய்ய முடியாது, தேங்காய்ப்பால் எண்ணெயாகி கொதித்து பறக்கும் அருகிலெல்லாம். ஒரு ஆளைக் கூப்பிடுவோம் தேங்காய் பிளிந்து எடுக்கவும் கிண்டுவதற்கும்... மிகுதிக் கவனிப்பு அம்மா. சூப்பரா இருக்கும். இப்போகூட இலங்கைத்தமிழ்க் கடைகளில்.. தொதல் என கிடைக்குது, ஆனா அம்மா செய்யும் டேஸ்டை எங்கும் காணவில்லை நான்.

இப்படி எல்லாவற்றிலும் தேர்ச்சி பெற்ற அம்மாவுக்கு, கேசரி செய்ய முடியவில்லை. பலமுறை நானும் அம்மாவுமாக சேர்ந்து கிண்டி... சக்கரைப்புக்கைபோல கறண்டியால் அள்ளிச் சாப்பிடும் பதமாகவே செய்தோம், துண்டு போட முடியவில்லை.

வேண்டாம் இது என கைவிட்டிருந்த வேளை, ஊரை விட்டு அப்பாவின் ஒபிஸ் குவாட்டேசில் கொஞ்சக் காலம் வந்திருந்த வேளை, பக்கத்தில் ஒரு பிள்ளை சொன்னா, நான் நல்லா செய்வேன் .. இன்ன இன்ன பொருட்கள் தேவை எண்டெல்லாம், சரி என பெரிய ஆரவாரத்தோடு வாங்கி, அப்பிள்ளையை முன்னால் விட்டு நானும் அம்மாவும் பின்னால் நிண்டு.. கிண்டி முடிச்சால்.. அதே சக்கரைப் புக்கை அவ்வ்வ்வ்வ்வ்:)... இது நமக்கினி வேண்டாம் என கைவிட்டாச்சு.

அது முடிஞ்சு, கொழும்பில் நான் வேர்க் பண்ணத் தொடங்கியிருந்த சமயம், அங்கிருந்த ஒரு நண்பி சொன்னா, அதிரா நான் கேசரி நன்கு செய்வேன், நான் சொல்லும் அளவில் செய்யுங்கோ பிழைக்காது, துண்டு வெட்டி எடுக்கலாம் என, இல்ல நான் கேசரியால் நொந்து போயிட்டேன் வேண்டாம் விடுங்கோ என்றேன், அவ விடவில்லை:).. அளவுகள் செய்முறை எல்லாம் சொன்னா.

அதைக் கொண்டு வீட்டுக்கு வந்து அம்மாவிடம் சொன்னேன். பின்னேரங்களில் அம்மாவும் நானுமாக சேர்ந்து படம், சீரியல் பார்ப்பதுண்டு, ஒருவர் தவறவிட்டால், மற்றவர் பார்த்து கதைகளைப் பரிமாறுவோம்[(இப்பவும் படக்கதை சொல்லுவேன் சில:), இம்முறை அம்மா இங்கு வந்திருந்தபோது,  “முப்பொழுதும் உன் கற்பனைகள்”.. கதை சொல்லி முடிச்சேன் ஹா ஹா ஹா.. அம்மாவின் நிலைமையே இப்பூடி எனில்??:) சரி வாணாம் விடுங்கோ:...]

இப்படி அம்மா ஏதோ பார்த்துக் கொண்டிருந்தவ, நான் சொன்னதும், சரி வா கிண்டிப்பார்ப்போம் என எழுந்தா, இல்லை அம்மா..  “பல எலி சேர்ந்தால் புற்றெடுக்காது”.. இம்முறை கரெக்ட்டான அளவுகளில் நானே செய்து வெற்றி வாகை சூடிவிட்டுக் கூப்பிடுறேன், நீங்க எனக்கு படம் பார்த்து கதையின் முடிவைச் சொல்லுங்கோ என சொல்லிவிட்டு கிச்சினுக்குள் போனேன்..[ஏனெனில் அம்மாவும் நானுமாக செய்யும்போது, கொஞ்சம் தண்ணி விடலாமே, இன்னும் கொஞ்சம் றவ்வை போடலாம்போல இருக்கு இப்படிச் சொல்லியே காரியத்தை கெடுத்த நாட்களும் உண்டு]. அதே முறையில் செய்தேன் சூப்பராக வந்துது, அன்றிலிருந்து இப்போ நம் குடும்பங்கள் எல்லோருக்கும் பழக்கிட்டேன்:).. இனிமேல் உங்களுக்கும்:).

==================================Happy New Year================================

அனைவருக்கும்.. அதிரா குடும்பத்தினரின் இனிய சித்திரைப் புத்தாண்டு வாழ்த்துக்கள்_()_. வாங்கோ வந்து கைவிஷேடம் எடுங்கோ.. அப்படியே.. இரு பொங்கலும் செய்தேன், கறியும் வச்சேன்... சாப்பிடுங்கோ.. அப்பு சாமீஈஈ எல்லோரையும் காப்பாத்துங்ங்ங்ங்ங்கோ.. என்னையும்தேன்ன்ன்ன்:). நடுவே இருக்கும் பெரீயா “பிங்கி” பூ, இப்போ எங்கள் காடினில் பூத்தது...

==========================================================================

கேசரி

தேவையானவை:

றவ்வை(Semolina) - 1 கப்
கேசரிக்கு எப்பவும் கோர்ஸ் றவ்வை என இருப்பதையே பாவிக்க வேண்டும்.. ஃபைன் றவ்வை களி போலாகிடும்.
கொதி தண்ணி - 1 1/2 கப்
சீனி (sugar)  - 3/4 கப்
நெய் - 2,3 மேசைக்கரண்டி
மாஜரின்/பட்டர் - 150 - 200 கிராம்ஸ்.
நட்ஸ் விருப்பத்துக்கு.[நான் பாவித்திருப்பது மிக்ஸ்ட் நட்ஸ்].
கேசரிப் பவுடர் - 1 தே.கரண்டி.

ஓகே நோட் பண்ணிட்டீங்களோ? அப்போ வாங்கோ குக்கரை ஓன் பண்ணலாம். முதலில் றவ்வையை ஒரு 3,4 நிமிடங்கள் மெல்லிசாக வறுத்து எடுத்து வைக்கவும். பின்பு நெய்யை ஊற்றி நட்ஸ் ஐ வறுத்து அப்படியே நெய்யுடன் எடுத்து புறிம்பாக வைக்கவும்.

இப்போ கொதிக்கும் தண்ணியை ஊற்றி, சீனியை அதனுள் போட்டு நன்கு கொதிக்க விடவும், சீனி கரைந்த பின், கலரிங் சேர்க்கவும். ஒரு ரகசியம் சொல்லட்டோ? கேசரிப் பவுடர் கிடைக்காத நேரம், நான் கறிக்கு பாவிக்கும் மஞ்சள் தூளைப் பாவிப்பேனாக்கும்:) [Turmeric powder].

இப்போ நெருப்பை குறைத்து வைத்துக்கொண்டு, றவ்வையை கொஞ்சம் கொஞ்சமாகச் சேர்த்துக் கிண்டவும், முழுவதும் கொட்டியபின், மாஜரினை கொஞ்சம் கொஞ்சமாகச் சேர்த்துக் கிண்டிக்கொண்டே வரவும், முடிவில் நெய்யுடன் சேர்ந்த நட்ஸ் ஐ போட்டுக் கிண்டி, இறக்கவும்..

சிலர் தனி நெய்யில் செய்வார்கள்.. அது கை எல்லாம் ஒட்டுவதுபோல வரும், இது அப்படியில்லை, இன்னுமொன்று ஓவராக நெய்யோ மாஜரினோ சேர்க்கும்போது.. களிபோல.. சக்கரைப் புக்கைபோலாகிடும்.

உடனேயே தட்டில் கொட்டி, கையில் சான்விச் பாக் ஐ போட்டு அழுத்தி விடவும்... சில மணித்தியாலங்கள் அப்படியே விட்டு விட்டு , கட் பண்ணவும்.

[உடனேயே கட் பண்ண வேணுமெனில், அரை மணி நேரம் ஃபிரிஜ்ஜில், மூடி வைத்து எடுக்கலாம்]. இப்போ திரும்படியும் மேலே ஓடிப்போய்:) கட் பண்ணிய துண்டுகளைப் பார்க்கவும்... கவனிக்கவும் பார்க்க மட்டுமே சொன்னேன்:).

இத்துடன் இன்றைய வகுப்பு நிறைவடைகிறது, மீண்டும் இன்னொரு சுவையான குறிப்போடு உங்களை சந்திக்க இருப்பவர்.. அதிரா chef:).

குட்டி இணைப்பு:- 

நெல்லைத் தமிழன் அவர்கள் சொன்னார், சமையல் குறிப்பு எழுதும் நேரம், கதை எழுதுங்கோ, நீங்க நன்றாக கதை எழுதுறீங்க என:)[அதாரது எழும்பி ஓடுறது கர்ர்ர்ர்:)].. இருப்பினும் மனம் பொறுக்கவில்லை குறிப்பெழுதிட்டேன்:). விரைவில் கதையும் எழுதப்போகிறேன்:). இடைக்கிடை சமையலும் போடுறேன்.. அப்போதானே நான் வீட்டில் ஒழுங்கா சமைக்கிறேன்.., அஞ்சுவைப்போல ஊர் சுத்தவில்லை:) எனத் தெரிய வரும்.. haa haa haa:).

இந்தாங்கோ புது வருச வடை... எடுங்கோ.. ஸ்ரொப் ஸ்ரொப்.. கையைக் காட்டுங்கோ.. ஆ மை இருக்கு.. இப்போ ஆளுக்கு ஒன்று எடுங்கோ:)..

இங்கே முதலாவதாக வருபவருக்கு ஆயா சுட்ட வடை தட்டோடு கிடைக்கும்:), 2வதாக வருபவருக்கு.. ஹலோ கிற்றி,  3வதாக வருபவருக்கு.. நியூ இயர் ஸ்பெஷல் 98 வயசு ஆயா:).. பார்ப்போம் யார் ஆயாவைத் தூக்க வருகிறார்கள் என:) ஹா ஹா ஹா.. ஹையோ பயப்பூடாதையுங்கோ, நான் இங்கினதான் இருப்பேன்.. பட்டுப் பட்டென பின்னூட்டங்களை வெளியிடுவேன்:).

ஊசி இணைப்பு:-

	Tweet