இரண்டு மாதத்தில் பிறந்த, ஒன்பது மாதக் குழந்தை:)

தலைப்புப் பார்க்க லேசா தலை சுத்துதோ?:) ஹா ஹா ஹா இது ஒரு உண்மைச் சம்பவம்.. அதுவும் வெளி நாட்டிலே நடந்திருக்கு:)..

இதில் ஒளிச்சு மறைக்க என்ன இருக்கு, பெண்குழந்தைகளுக்கு பருவ வயதை அடைந்தபின், ஒவ்வொரு மாதமும் ஏற்படும் உடல் உபாதைகள் ஒவ்வொருவருக்கு ஒவ்வொரு விதமாக இருக்கும்.

அதில் ஒவ்வொருவரும் படும் அவஸ்தைகள் சொல்லிப் புரிய வைக்க முடியாது, ஆனா சிலருக்கு வருவதும் தெரியாது போவதும் தெரியாது.. எது எப்படியோ, நம் நாட்டில் மட்டும் இதை என்னமோ பெரீய ஒரு குற்றமாகப் பார்ப்பதுபோல தோணும்... அந்த மூன்று நாட்களும் மெத்தையில் படுக்க முடியாது, வீட்டுக்குள் உலாவ முடியாது, கிச்சினுக்குள் போக முடியாது, புறிம்பான படுக்கை புறிம்பான பாத்திரங்கள்:)) ஹையோ இது இந்துக்களிடையே ரொம்பவும் மோசம்:)) இது எனக்கு கொஞ்சம் கூடப் பிடிப்பதில்லை..[இவை அனைத்தும் திருமணத்தின் முன்னர்தான், பின்புதான், நாம் அம்மா பேச்சைக் கேட்க மாட்டோமே:)] ஆனா உடல் ஓய்வுக்கு எனத்தான் அப்படிச் செய்வது எனச் சொல்கிறார்கள்.... அது ஒரு வகையில் சரியாக இருக்கலாம், ஆதி காலத்தில் பெண்கள், வீட்டு வேலை முளுவதையும் இழுத்துப் போட்டுச் செய்வதனால்..கட்டாயப்படுத்தப் படுவதால், இச்சட்டம் கொண்டு வரப்பட்டிருக்கலாம் என நினைக்கிறேன், இல்லை எனில் அவர்களுக்கு ஓய்வு ஏது?..

ஆனா இப்படியான காலங்களில் பெண்கள் உடலால் மட்டுமல்ல மனதாலும் கொஞ்சம் டிப்பிரெஸ்ட் ஆவே இருப்பார்கள், இதனை கண்டு கொள்ளாத சில ஆண்களும் உலகில் இருக்கிறார்கள், பெண்களுக்கும் ஓய்வு தேவை என எண்ணிக்கூடப் பார்க்க முடியாதோரும் இருப்பதை அறியும்போது வேதனையாகவே இருக்கும்.

பேபி அதிரா:) வைரவருக்குப் பூ பிடுங்கினது போதும் வாங்கோ:)

இலங்கையைப் பொறுத்து அங்கு யூனிஃபோம் வைட் அண்ட் வைட் தான் எப்பவுமே... அதனால அந்த யூனிஃபோமோடு நாம் போடும் போராட்டமிருக்கே:) இப்படியான நாட்களில்... சொல்லி முடியாது. ஆனா அங்கு ஒரு நல்ல நடை முறை இருக்கிறது, ஹைஸ்கூல்கள் பெரும்பாலும் ஆண்களுக்கு தனி, பெண்களுக்கு தனி.... தரமான ஸ்கூல்கள் எல்லாம் இப்படித்தனித்தனியே தான் இருக்கும். ஸ்கூல் பஸ்கள்கூட தனித்தனிதான், அதனால நமக்கு சுகந்திரம் அதிகம்:)...

சுவீட் 15 அதிரா:).. தண்ணி பட்டு படம் கலங்கி விட்டது:)

இப்போதைய தலைமுறையில் இது நிறைய மாறிவிட்டது, பிள்ளைகள், வாய்காட்டி.. அப்படி எல்லாம் முடியாது, ஸ்கூலுக்குப் போவேன், நான் இப்படித்தான் இருப்பேன் என்பதுபோல இருக்கிறார்கள்.. முக்கியமாக வெளிநாட்டில் இப்போ இந்த ஓய்வுமுறை அடியோடு இல்லாமல் போய்விட்டது, பிள்ளைகளும் எதையும் பெற்றோருக்கு சொல்வதுமில்லை.

ஆனா வெளிநாட்டைப் பொறுத்தவரை, ஸ்கூலிலேயே அனைத்தையும் சொல்லிக் குடுத்து விடுகிறார்கள், அதனால பருவமடைய முன்பே குழந்தைகள் மனதால் ரெடியாகி, அந்நாளை எதிர்ப்பார்த்திருக்கிறார்கள்.. இது மிகவும் வரவேற்கத்தக்கது, நமக்கு அப்படி என்றால் என்னவென்றே தெரியாது:), நான் எல்லாம், எனக்கென்னமோ ஆகிப்போச்சு என அழுதேன் தெரியுமோ ஹா ஹா ஹா... இப்படி தெரியாமல் இருப்பது தப்புத்தானே.

இன்னொன்று வெளிநாட்டில், இப்படியான நாட்களில், ஸ்கூலில் ஜிம் செய்யத்தான் வேண்டும், மற்றும் சில ஸ்கூலில் சுவிமிங் வகுப்புக்கள் இருந்தால் கூட, பங்குபற்ற வேண்டுமாம், விடமாட்டினமாம், மெடிகல் வசதி, விஞ்ஞான வளர்ச்சிதான் இதுக்கெல்லாம் காரணம்.

அடுத்து நம்மவர்களில் ஒரு பழக்கம், பெண் குழந்தை கண்ணுக்கு குளிர்ச்சியாக வளர்ந்திருந்தாலே, முதலாவது கேட்கும் கேள்வி, மகள் சாமத்தியப்பட்டு விட்டாவோ?:).. இல்லை எனச் சொல்லிட்டால், கண்ணால குழந்தையை அளந்தபடியே சொல்லுவார்கள்... அப்போ விரைவில உங்களுக்கு ஒரு கொண்டாட்டத்துக்கு இடமிருக்குதுபோல:)... இது எல்லாம் எனக்கு அடியோடு பிடிப்பதில்லை.

இங்கத்தைய ஸ்கொட்டிஸ் நண்பியோடு இது பற்றி டிஸ்கஸ் பண்ணிய இடத்தில், அவ சொன்னா ஆரிடமும் கேட்டிடாதையுங்கோ அதிரா, மகள் பருவமடைந்திட்டாவோ என, இவர்களுக்குப் பிடிக்காது, வெளியில் சொல்ல விரும்பவும் மாட்டார்கள், ஏனெனில் இங்கு தெரிந்தால் ஆண் பிள்ளைகள் தவறுக்கு அழைத்திடுவார்கள் என்பதுபோல ஒரு எண்ணம் இருக்கிறதாம், அதனால் குழந்தைக்கு ஓரளவு புத்தி வரும்வரை வெளியே சொல்ல மாட்டினமாம்.

கனடாவில் அக்காவின் மகளின் டான்ஸ் வகுப்பினரோ, ஏதோ ஒரு வகுப்பினரோடு காம்பிங் அழைத்துப் போனார்களாம், அதில் 4,5 நம் நாட்டுக் குழந்தைகளாம், எல்லோரும் அப்போதான் வயதுக்கு வந்திருந்தனர், அதில் ஒரு குழந்தை மட்டும் சாமத்தியப் படாதவவாம். அப்போ tour போன இடத்தில், முதல் நாளே அக்குழந்தை சாமத்தியப் பட்டு விட்டாவாம், வீட்டுக்கு சொன்னால் வந்து அழைத்துப் போய் விடுவார்கள் என, நண்பிகள் சேர்ந்து அவவை ரெடியாக்கி, தம்மோடு ஜாலியாக எஞோய் பண்ண விட்டு, 4 நாட்களின் பின்பு வீட்டுக்கு வந்தும், பெற்றோரிடம் சொல்லப் பயத்தில், ஒரு கிழமை போனபின்னரே மெதுவாக தாயிடம் சொன்னாவாம்.. அதன் பின்னரே பெற்றோர் அமளிப்பட்டு ஸ்கூல் போக விடாமல் மறிச்சு, பத்தியம்,, சடங்கு சம்பிரதாயம் எனப் பண்ணினார்களாம் ஹா ஹா ஹா.. அப்போ பாருங்கோ... இதில் எனக்கு என் ஒன்றுவிட்ட அண்ணா சொன்னது நினைவுக்கு வருது:-  “உங்களுக்கு நன்கு பிடிச்ச விசயம், அது தப்பில்லாததாக இருப்பின்...அதனை செய்திடுங்கோ:), செய்தபின் விட்டில் அடிவாங்கினாலும் பறவாயில்லை:))”.. ஹா ஹா ஹா.

சரி இப்போ தலைப்புக்கு வருகிறேன்..

இப்படியான மாதம் மாதம் வரும் உபாதைகளால், பெண்கள் நினைப்பது கடவுளே இது வராமல் விட்டால் நல்லாயிருக்குமே என:).. சிலருக்கு ஒழுங்காக வருவதில்லை, 2,3 மாதத்துக்கு ஒரு தடவை கூட வரும்... இப்படியான ஒருவரின் கதைதான் சொல்லப்போறேன்.

எனக்கு தெரிந்த ஒருவருக்கு, இப்படித்தான் 2 மாதமாக எதையும் காணவில்லையே என, வீட்டில் வைத்து test பண்ணியிருக்கிறா, அது நெகடிஃப் என்றே காட்டியிருக்கு, அதனால சரி இது நோர்மல்தானே என விட்டிட்டா, அத்தோடு அவர்கள் குடும்பமாக இலங்கை போகவென ரிக்கெட் எல்லாம் போட்டிருந்தமையால், ஷொப்பிங்.. அது இது என நாட்கள் ஓடியிருக்கு... வயிறு மெதுவாக பெருத்திருக்கு... இவ நினைச்சிருக்கிறா.. ஏதும் கட்டி வளருதாக்கும் எதுக்கும் ஊர் அலுவலை முடிச்சு வந்து டொக்டரைப் பார்க்கலாம் என:),  வண்டி[வயிறு] எனச் சொல்லுவோமே நாம்.. அப்படி வண்டி வச்சிருந்ததாம், ஆனா அவ நல்ல வடிவா சாப்பிடுவா:) நோர்மலாவே  வண்டிதான், அதனால பெரிசு பண்ணவில்லை.

ஊருக்குப் போய் நன்கு ஸ்கூட்டர், ஓட்டோ, வான் , பஸ் என சுத்தி அடிச்சு, கோயில், குளம் எல்லாம் உலாவி விட்டு, திரும்பி வெளிநாடு வந்திட்டினம்.. அப்போ கூட எந்த அசம்பாவிதமும் இல்லை.. பின்பு ஊர்க் களை எல்லாம் போக்கியபின்புதான், இவவுக்கு வயிற்றில் ஏதோ அசைவதுபோல ஒரு ஃபீலிங் வந்திருக்கு:).. பதறிக்கொண்டு டொக்டரிடம் ஓடினால், செக் பண்ணி விட்டு.. உனக்கு 7 மாதம் முடிந்து விட்டது .. இன்ன திகதியில் குழந்தை கிடைக்கும் எனச் சொல்லியாச்சு ஹா ஹா ஹா.. இரண்டு மாதத்தில் நல்ல அழகான குண்டான கெல்த்தியான பெண் குழந்தை கிடைச்சது .. இது அவர்களுக்கு பிறந்திருக்கும் 3 வது குழந்தை:).

அப்போ பாருங்கோ அனைத்துக்கும் மனம் தானே காரணம், முதல் மாதத்திலேயே தெரிஞ்சிருந்தால், நடக்கப் பயம், இருக்கப்பயம், வேலை செய்யப் பயம், இப்படி எவ்வளவு பத்திரமாக இருப்போம்.. சத்தி, பிரட்டு என அது ஒரு பக்கம்... இது இவவுக்கு எதுவுமே இல்லையாம் ஹா ஹா ஹா:)..

இப்போஸ்ட்ட்டை சும்மா எழுதத் தொடங்கினேன், ஆனா இன்று பார்க்கிறேன், இன்று சர்வதேச பெண் குழந்தைகள் தினமாமே:).. பாருங்கோ கடவுள் அதிராவின் பக்கம்:)).. அதனால இன்றே போட்டிடுவோம் என அவசரமாகப் போடுகிறேன்:).. 

வாழ்த்துக்கள் அனைத்துக் குழந்தைகளுக்கும் அண்ட் அதிராவுக்கும்:))

=====================================================================

ஊசி இணைப்பு:

_________________________()____________________________

	Tweet