பாவற்காயும், றீட் மோர் உம்:)

வாங்கோ வாங்கோ... பாவற்காய் தெரியும் அதென்ன மோர்? றீட் மோர் எனப் புதிசா இருக்கே என நினைச்சு வந்திருக்கிறீங்க... தயங்காமல்  வாங்கோ.. நான் இம்முறை இரண்டு மெயின் டிப்பாட்மென்ட்களைப்:) பற்றிப் பேசப்போகிறேன்...

அதில் முதலாவது கிச்சின் டிப்பார்ட்மெண்ட்:)... ஹையோ எதுக்கு இப்போ , கிச்சின் என்றதும்..மருந்தடிச்ச பூச்சிபோல எல்லோரும் பொத்துப் பொத்தென மயங்கி விழுறீங்க?:).. அப்பூடி நான் என்ன சொல்லிட்டேன்ன்:).. ஆராவது ஐஸ் வோட்டர் அடிச்சு எழுப்பிவிடுங்கோ எல்லோரையும்:).. இல்லையெனில் என் கைக்கு சங்கிலி வந்திடப்போகுதே வைரவா...:).

சரி சரி.. பாகற்காய் எனில் ஆரம்பம் கசக்கும்தானே:), எதுக்கும் பக்கத்தில் இருக்கும் பனை ஓலை, கிடுகு வேலிகளைப் பிடிச்சபடி:) ஸ்மார்ட்டா நின்று என் சமையல் குறிப்பைப் படியுங்கோ.

பாவற்காய்களில் வெள்ளையும் இருக்கு, குட்டிக் குட்டியாக பச்சையும் இருக்கு... இதில் இந்தப் பச்சைப் பாவக்காய்கள்தான் அதிகம் மருத்துவம் நிறைந்ததாம், பிளட்டில் சுகர் இருப்பதுபோல காட்டினால், பயப்படாமல் இந்த பச்சைப் பாவலை, தினமும் காலையில் கரட் துருவலில் துருவி, அப்படியே வெறும் வயிற்றில் சாப்பிட்டால்.. ஒரு மாதத்தில் எல்லாமே நோர்மலாகிடும்...[இது எங்கட அப்பாவின் அனுபவத்தை வைத்துச் சொல்கிறேன், ஸ்ஸ்ஸ் இப்பூடி விளக்கமா எழுதாட்டில்.. அதிராவுக்கு சுகரோ எப்ப தொடக்கம் எண்டெல்லாம் குறொஸ் குவெஷ்ஸன்ஸ் வரும்:).. ].

எங்களுக்கு இப்போதான் புதுசா தமிழ்க்கடை திறந்திருக்கு என்றேனே, அங்கு இந்த பச்சைப் பாவல்தான் கிடைக்குது. சரி இதை, கசப்பில்லாமல் எப்படி கறி வைப்பது எனச் சொல்கிறேன்... செய்து பாருங்கோ.

பாவற்காய்க் கறி:

ஒரு அரைக்கிலோ பாவற்காயை, வளமையாக பொரியலுக்கு வெட்டுவதுபோல வெட்டி எடுத்து, நல்ல புளி:) ஒரு பெரிய எலுமிச்சை அளவு உருண்டை எடுத்து அப்படியே கரைத்து, இந்த பாவற்காயோடு மட்டமாக விட்டு, ஒரு தேக்கரண்டி வெந்தயம், வெங்காயம், பச்சை மிளகாய், விருப்பப்படி உள்ளி, அளவுக்கு கறித்தூள் சேர்த்து மூடி வேக விடோணும். 

அம்மா சொல்லுவா இக்காலத்துப் பெண்கள், தாம், வன் அவரில் சமையல் முடிக்கிறோம் என ஸ்டைலாச் சொல்லிப்போட்டு... நல்லா நெருப்பை எரியவிட்டு சமைச்சு முடிக்கிறார்கள்.. அது சுவை குறைவாக இருக்கும், எப்பவும் மெல்லிய நெருப்பில் கொஞ்ச நேரம் எடுத்து அவிக்கும்போது கனிந்து வரும்.. சுவையும் அதிகமாகும் என... ஹா ஹா ஹா நமக்கு நேரம்தானே முக்கியம்:).

அதேபோல நெருப்பை கொஞ்சமாகவே வைத்து அவிய விட்டு, அவிந்து வத்தி வந்ததும், மூடி திறந்து பிரட்டி, கால் டம்ளர் அளவு பால் விட்டு, அளவுக்கு உப்பு போடவும்...[பால் கட்டாயமில்லை]. நன்கு பிரட்டலானதும் , ஒரு தேக்கரண்டி சீனி[sugar], கறிவேப்பிலை சேர்த்து இறக்கவும். கடைசியில் உப்பு சேர்த்தால்தான், கசப்பு தன்மை பார்த்து சேர்க்க முடியும், ஆரம்பம் சேர்த்தால் சிலசமயம் கசப்பு அதிகமாகிடும்.

அடுத்து, அதிரா கிச்சினில் நாம் பார்க்கப்போவது...:).. ஸ்ஸ்ஸ் அதாரது எழுந்து ஓடுவது, நாம ஆரு?:) வருமுன் காப்போனாக்கும்:) டோர் லொக்ட்:)..

பாவற்காய் சம்பல்:

இதேபோல கட் பண்ணிக் கொஞ்சப் பாவற்காயை எடுத்து, நொன் ஸ்ரிக்கில் போட்டு தண்ணித்தன்மை வற்றும் வரை வாட்டவும், நன்கு வாடியதும், 2,3 கறண்டி நல்லெண்ணெய் விட்டு, அதில் அரைப்பதமாக வாட்டி எடுக்கவும்.

அதற்குள், சின்ன வெங்காயம் குட்டிகுட்டியாக வெட்டிப்போட்டு, சுவைக்கு உப்பு சேர்த்து, கொஞ்சம் தேசிக்காய் பிளிந்து விட்டு, கடைசியில்... பிரின்சிபல், டாக்டர் தாமோதரம்பிள்ளை அங்கிள் சமைக்கும்போது கையால் பிசைவாரே:) அப்படி கொஞ்சம் வெங்காயம் பாவற்காயுடன் சேருமாறு மெதுவாக பிசைந்து விட்டால் பாவற்காய் சம்பல் ரெடி. இதிலும் தக்காளிப்பழம் விரும்புவோர் இதனுள் ஒரு தக்காழிப்பழத்தைக் குட்டியாக அரிந்து போட்டு ஒரு மேசைக்கரண்டி பாலும் சேர்த்தால்ல் சூப்பரோ சூப்பர்...  விருந்து நேரங்களில் இப்படி தக்காளிப்பழம் சேர்த்து வைப்பது வளமை. எங்களுக்கு தக்காளி அலர்ஜி:).

========&&&===== ஒக்கே கிச்சின் டிப்பார்ட்மெண்ட் குளோஸ்ட்=====&&&========

ஊசி இணைப்பு:-

அடுத்த டிப்பார்ட்மெண்ட்தான்.. எங்கட புளொக்:)...,  ஊரெல்லாம் பென்னாம்பெரிய போஸ்ட்டாகவும், ஸ்லோவாகவும் இருந்த புளொக்குகளை எல்லாம் குட்டிப் போஸ்ட்டுக்களாகவும், ஸ்பீட்டாகவும் மாத்தச் சொல்லி, ரியூஷன் பீஸ் இல்லாமல் கிளாஸ் எடுத்து, மிரட்டி:) வெருட்டி:)... மாத்த வச்ச பெருமைக்குரியவருக்கு எப்படி நன்றி சொல்வதெனத் தெரியாமல், இங்கே உண்டியல் வைக்கிறேன்.. மொய் வச்சிடுங்கோ.. எல்லோரும் சேர்ந்து ஒரு “மொடல்” கார் வாங்கிக் குடுக்கப்போறோம்:).... அவர் யாரெனத் தெரிஞ்சிருக்குமே,  இருப்பினும் ஒரு சின்ன விளக்கம்.. அன்பாக அழைச்சால் அஞ்செழுத்து:).. செல்லமாக அழைத்தால் ரெண்டெழுத்து:)... அவர்தான் எங்கள் அன்புச் சகோதரர் டிடி... 

பதிவில்லாத புளொக்குகள் இருக்கலாம், ஆனால் அவரின் கொமெண்ட் இல்லாத புளொக்குகளைக் கண்டு பிடிப்பது அரிது... நேரமில்லை, வேலை, போட்டி, பொறாண்மை, எனக்கு சொறிஞ்சால்தான் உனக்கும் சொறிஞ்சுவிடுவேன்.. ஹா ஹா ஹா இப்படிப் பல பிரச்சனைகளையும் தாண்டி , அவரது கொமெண்ட்ஸ் ஐ எங்கும் காணலாம்... மிக்க நன்றி சகோதரர் தனபாலன்.

=============================================================================

=============================================================================

	Tweet